Riyadh(INO) –Shaqaale gaaraya afar kun oo ruux oo Jabutiyan ah ayaa la filayaa in ay gaaraan boqortoyada Sacudi Carabiya dhowrka bilood ee soo socota kadib markii labada wadan ay heshiis gaareen bishii aynu ka soo gudubnay.
Isagoo la hadlayay saxaafada safiirka Djibouti ee dalka Sacudi Carabiya Diaa Eddin Saeed Bamakhrama in heshiiska ay gaareen labada dal ay shaqaalahan ka koobnan doonaan haween guryaha ka shaqeeya, darawalo iyo shaqaale kale.
Bamakhrama ayaa sheegay in shaqaalaha reer Jabuti aan loogaga baahnayn in ay bartaan luqada Carabiga maadaama luqada reer Jabuti ay isku dhow yihiin luqada Carabiga. Hase yeeshee shaqaalahan ayaa inta aysan tegin Boqortoyada Sacudi Carabiya waxa ay mari doonaan baaritaan caafimaad.
Boqortoyada Saudi Arabia ayaa la saxiixatay heshiis ay shaqaale dhinaca shaqaalaha ah wadamada Djibouti iyo Niger horaantii bishan kulankii 104aad ee Ururka Shaqaalaha Adduunka. Sidoo kale Boqortoyada Sacudi Carabiya ayaa heshiis kan la mid ah la saxiixatay wadamada Philippines, Sri Lanka, Indonesia, Nepal, India, Bangladesh iyo Pakistan.
Sacudi Carabiya ayaa dhowrkii bilood ee la soo dhaafay waxa ay ka saaraysay muwaadiniin badan oo Soomaali ah dalkeeda. Kumanaan dhalinyaro isugu jira rag iyo dumar ayaa laga soo dejiyay garoonka diyaaradaha ee magaalada Muqdisho kadib markii laga soo tarxiilay Sacudi Carabiya.
Inta badan muwaadiniinta Soomaalida ah ayaa si dhuumaalaysi ah ku gashay Sacudi Carabiya iyagoo sii maray wadanka Yemen.
Idale News Online, Riyadh
