Xudur(INO)-Ururka Al Shabaab, ayaa xukun qoor goysmo ah ku fuliyay laba ka mid ah ganacsatada ku dhaqan Gobolka Bakool, markii ay diideen bixinta lacago ay Shabaabku weydiisteen.
Dhacdadaan, ayaa maanta ka dhacday deegaanka Buulo Jadiid oo dhacda duleedka Magaalada Xudur. Labadaasi nin waxaa gurigooda lagala baxay saqdii dhexe ee xalay, iyadoona saakay la dilay.
Meydadkooda, ayaa waxaa lagu arkay wado ku taala Buulo Jadiid, taasoo baqdin gelisay bulshada ku nool deegaankaasi, iyagoona si weyn u hadalhaya.
Maxamed Macalin Axmed, Gudoomiyaha Magaalada Xudur ee Maamulka Gobolka Bakool, ayaa wax laga xumaado ku tilmaamay tallaabada ay Shabaabku ku gowraceen labadaasi nin.
Gudoomiyaha waxa uu Ururka Al Shabaab uu ku dhaliilay kuwo gacan bir leh ku maquuninaya bulshada Somaliyeed, iyagoo gowracaya cid kasta oo awaamiirtooda diida.
Maxamed Macalin oo la hadlay Warbaahinta RADIO IDALE ayaa ku waramaya in Shabaabku ay qoorta ka jarayan ganacsatada, haddii ay diidaan bixinta dhaqaalaha lagu dardar-gelinayo dagaalada ay dalka ka wadaan.
Shabaabka, ayaa marar badan waxay gowraceen rag kala duwan, iyagoo qaarkood ku eedeeyay falal basaasnimo.
Idale News Online, Xudur.
