Copenhegan(INO)-Ugu yaraan laba ruux, ayaa ku dhimatay, tiro kalana waa ay ku dhaawacantay, markii weerar hubeysan xalay lagu qaaday maqaaxi ku taala Magaalada Gothenburg ee Wadanka Sweden.
Dabley hubeysan, ayaa weerar ku qaaday dad maqaaxida ku daawanaayay ciyaar xiiso badnayd oo ka tirsaneyd koobka dhegaha waaweyn ee Champion League, una dhaxeysay kooxaha Manchester City iyo Barcelona.
Booliska oo daqiiqado ka dib gaaray maqaaxidii uu falku ka dhacay, ayaa gurmad u fidiyay dadkii ku waxyeeloobay weerarkaasi. Sidoo kalana waxay aaggaasi ka bilaabeen hawlgal ka dhan ah kuwii weerarkaasi geystay.
Booliska, ayaa weerarkaasi la xiriirinaya gaangis reer Sweden ah, iyadoo aynaan Dowladda Sweden muujin in weerarkaasi ay Islaamiyiin wax xiriir ah la lee yihiin.
Booliska Gothenburg, ayaan sheegin inay dad u soo qab qabteen weerarkaasi iyo in kale, balse waxay Warbaahinta Sweden u sheegeen in baaritaanada ay weli gacanta ku hayaan.
Idale News Online, Copenhegan
