Kismaayo(INO)-Madaxweynaha Maamulka Jubba, Axmed Maxamed Islaam (Axmed Madoobe), ayaa markii horeysay si kulul kaga hadlay Mooshinka laga keenay Baarlamaanka Jubbaland, isagoona ka digay in xiriirka u jaraan Dowladda Federalka Somaliya.
Axmed Madoobe, ayaa marka hore yiri “Waxaa is weydiin mudan maxaa Jubba lagu maagan yahay markii aan Bilownay Dhismaha Maamulkan R/Wasaarihii xiligaas jiray iyo Dowladda Federaalka ahba waxay bilaaben in ay dagaal nala galaan, oo xtaa xiligii aan wadnay Dhismaha Maamulka, iyagoo aan ogayn cidda soo baxaysa, waxaa ay lahayeen ma aqoonsanin waxa halkaas ka socda.“Markii aan anagu Somalinimo iyo in wax la hagaajiyo aan Doono maha in hadba dhinac nalaga soo maro.”
Markale waxa uu yiri “Maanta waxaad ogtihiin waxa Baarlamaanka Federaalku ay ku dhaqmayaan, iyagoo aan dhul nala xoraynin oo aan wax taakulo ah aan eeganadan ka gaysan, ma aqaan sabab sharci ah oo ay yidhaahdan Mooshin baan idinka Keenayna.”
Waxa kaloo uu yiri “Waxaan cadaynayaa in wax Mooshin ah oo ay naga keeni karaan aysan jirin. Dowladda Federaalka ah oo Madaxweynahu uu yahay ninka ugu sareeya isagiiba joogey, madashii wax lagu samaynayay oo caleemo saarkii joogey. Warka waxay ila tahay in isaga laftigiisa aysan nimankan ogolayn, maadama wixii oo wax ka yegleelay ay diidan yihiin.”
Maalinta berrito ah oo la fillaayo in Xildhibaanada Baarlamaanka Somaliya, ay codka kalsoonida u qaadaan Mooshinka ka dhanka ah Baarlamaanka Jubba, ayuu Axmed Madoobe sheegay inay xiriirka u jari doonaan Dowladda Federalka, haddiiba la dhaqangeliyo Mooshinkaasi.
“Waxaan idin sheegayaa haddii berri ay Xildhibaanadaas qayla quutayaasha ah fariistan, oo ay Mooshinkaas meel mariyaan in xiriirka anaga iyo Dowladda Federaalka ah uu halkaas ku egyahay, Maamul walba goonidiisa ayuu isku maamulayaa.” Ayuu yiri Madaxweynaha Jubbaland oo shir jaraa’id ku qabtay Madaxtooyada Magaalada Kismaayo.
“Anagana wixii tabasha ah anagaa dhamaysanayna, lakiin waxaan idiin sheegayaa in aan hal mid lagu daraynin Baarlamaanka Jubbaland. Waxaa jirta Xukuumad Maamulo heer segmo iyo heer gobol, Anagaa naqaana sidaan dadkayaga u qancinayno.” Ayuu sii raaciyay Axmed Madoobe.
Mooshinka la bilaabay in Maamul Goboleedyada laga keeno, ayaa waxaa lagu macneeyay mid ku cusub saaxada siyaasadda Somaliya, waxaana muuqanayso in culeyskeedu uu lee yahay.
Idale News Online, Kismaayo
