Muqdisho(INO)-Ciidanka Hay’adda Nabad Suggida Gobolka Banaadir, ayaa daqiiqado ka hor waxay xireen Isgoyska Dabka ee Magaalada Muqdisho, ka gadaal markii lagu arkay gaari nooca raaxada ah oo laga shakiyay.
Gaarigaan oo Suzuki lagu sheegay, ayaa la soo dhigay meel khaldan oo wadada ka baxsan, waxayna taasi dhalisay shakiga ah in looga shakiyo walxaha qarxa, in laga soo buuxiyay.
Ciidamada Nabad Suggida, ayaa waxay wadada ka celinayan gaadiidka iyo dadka, iyagoona ku amraaya ina dib ugu laabtaan goobihii ay ka kala yimaadeen.
Arrinta kale ee shakiga dhalisay, ayaa waxay tahay in uu cararay ninkii gaarigaasi lahaa, markii ay halkaasi soo gaareen Ciidamada Nabad Suggida Gobolka Banaadir.
Waxaa Maqribnimadan soconayo dadaalo looga hortagaayo in khasaaro uu geysto gaarigaasi, haddiiba ay saaran yihiin walxaha qarxa.
Toddobaad ka hor, ayaa gaari nooca raaxada ahaa la soo dhigay dhabarka dambe ee Maka Al Mukarama Hotel, oo ku dhow Isgoyska Dabka, xilli gaarigaasi lagu soo buuxiyay walxaha qarxa.
Ciidamada Nabad Suggida iyo Booliska oo gacan ka helaaya Ilaalada Maka Al Mukarama Hotel, ayaa weerarkaasi fashiliyay, waxaana gacanta lagu soo dhigay mid ka mid ah ilaa saddex nin oo gaarigaasi wadatay.
Idale News Online, Muqdisho.
