Afgooye ( INO)-Kolonyo ay la socdeen Ciidamada AMISOM oo ka tegay degmada Afgooye kuna sii jeeday deegaanka Carbiska ayaa qarax lagula eegtay duleedka Degmadaasi kaasoo burbur uu ka soo gaaray mid ka mid ah Gadiidka AMISOM sida ay sheegeen Saraakiisha Amniga ee Maamulka Degmada Afgooye.
Dhinaca kale Afhayeenka AMISOM oo la hadlay Shabelle ayaa qiray in uu jiro warka sheegaya Qaraxaasi lala eegtay Ciidamada AMISOM in uu mid ka mid ah Gawaaridooda uu ka soo gaaray burbur.
Hase ahaatee wuxuu meesha ka saaray in wax khasaaro ah ay soo gaareen Ciidamadooda iyo Shacabka intaba.
Al Shabaab ayaa muddooyinkii dambe weeraro iyo Qaraxyo khasaaro geystay la Bartilmaamsanayay Saldhigyada Ciidamada dowladda iyo kuwa AMISOM ku leeyihiin Gobolka Shabeelaha Hoose.
