Baydhabo(INO); Dowlada Shiinaha ayaa garka iyo xijaabka ka mamnuucay gobolka ku yaalla galbeedka fog ee Xinjiang, waxaana amarkan lagu tilmaamay olole lagula dagaallamayo islaamiyiinta xagjirka ah.
Talaabooyinkan waxaa ku jira in la mamnuuco in raggu gar aan caadi ahayn daystaan, in haweenku ay xijaabka ku xirtaan goobaha dadweynaha.
Gobolka Xinjiang ayaa ah meel ay ku badan yihiin dadka loo yaqaano Uighurs, oo ah dad Muslimiin ah oo sheega in la faquuqo, laguna hayo caburin joogto ah.
Sanadihii u dambeeyey ayaa waxaa gobolkaas ka dhacay dagaallo uu dhiig ku daatay, iyadoo Xukuumadda Shiinaha rabshadahaas ku eedeysay mintidiin islaamiyiin ah iyo gooni-u-goosato.
Balse kooxaha u dooda xuquuqda aadanaha ayaa sheegayaan in deganaansho la’aanta ay keentay siyaasadaja cabburinta ku dhisan ee dowlada shiinuhu kula dhaqanto gobolkaas, kuwaasoo ku jiiday xagjirnimo qaar ka mid ah dadka halkaas ku dhaqan.
Xannibaadyo adag ayaa horeba uga jiray Xinjiang. Wakaaladda Reuters ayaa sheegaysa in shuruucda cusub ay sidoo kale mamnuucayaan, arrimo ay ka mid yihiin inaan loo ogolaan carruurtu inay iskuullada dawladda aadaan, inaan la adeecin siyaasadaha qorshaynta qoyska, in si ula kac ah loo waxyeeleeyo dukumenti dawladeed, iyo in guurka lagu saleeyo diinta.
Dowlada Shiinuhu waxay horeba ugu soo rogeen gobolkaas tallaabooyin uu ka mid yahay inaan dadka Uighurs la siinin baasaboor iyo in dadka halkaas degan aan loo ogolaan iney soo xajiyaan.
Idale News Online,
