Muqdisho(INO)-18 askari oo ka tirsan Ciidamada AMISOM, gaar ah kuwa Uganda oo lagu soo oogay dambi la xiriira in iibsadeen shidaal, ayaa Maanta Muqdisho lagu soo taagay Maxkamada Military.
Gudoomiyaha Maxkamada Milateriga Dick Olum oo warbaahinta la hadlay ayaa sheegay in Sarkaal ka mid 18 Askari ee la soo eedeeyay inuu qirtay dambigiisa isla markaana lagu xukumay Hal sano oo xarig ah iyo darajadiisan oo hoos loo dhigay.
Dhinaca kale, Dick Olum Gudoomiyaha Maxkamada Ciidamada ayaa xusay inay socoto Dhageysiga Dacwado loo haysto 17 Askari oo kale, islamarkaana markii ay soo gebogebowdo Maxkamadayntooda la xukumu doon.
Maxkamada Maanta u fariisatay Dacwada 18 Askari ee lagu soo eedeeyay in ay dhawaan Magaalada Muqdisho ku iibiyeen Shidaal Saanad Milateri oo ay AMISOM leedahay ayaa waxaa ay hoos tagtaa Maxkamada Ciidamada Milateriga ee dalka Uganda.
Askarta AMISOM ee lasoo taagay Maxkamadda ayaa waxaa lagu helay inay iibsadeen 10 ilaa 15 Kun oo Litir oo Shidaal ah, kaasi oo ay ka iibiyeen Ganacsato Soomaali ah oo ku sugnaa KM5.
Maxkamadeynta Maanta ayaa noqoneysii tii ugu horeysay oo lagu qaado Ciidamo ka tirsan kuwa Nabad ilaalinta Midowga Afrika ee AMISOM.
