Muqdisho(INO)- Madaxweynaha Soomaaliya Xasan Sheekh Maxamuud ayaa lagu wadaa in saacadaha soo socda uu gaaro magaalada Beledweyn ee xarunta Gobolka Hiiraan, si uu mar kale ugu qanciyo odayaasha dhaqanka reer Hiiraan dib u ambaqaadida shirka Jowhar iyo sidii loo xalin lahaa tabashooyinka ay qabaan.
Booqashada Madaxweynaha ee Beledweyn ayaa qeyb ka ah dadaalo dowladda Federaalka ku dooneyso inay ku xaliso tabashada ay qabaan odayaasha dhaqanka Gobolka Hiiraan, iyadoo aan wali mira dhalin dadaalada ay wadeen Madaxda dowladda iyo Xubno ka tirsan Golaha Wasiirada oo dhowr jeer isaga daba noqday Beledweyn.
Wararka ayaa sheegaya in Ilaalada Madaxtooyada iyo ciidamada sida gaarka ah u tababaran ay goor dhow gaareen magaalada Beledweyn, kuwaasoo sugaya ammaanka Madaxweynaha, waxaana dhici karta in booqashada Madaxweynaha ay dhowr cisho qaadato, inta uu ka xalinayo muranada jira.
Ra’iisul Wasaare Cumar Cabdirashiid iyo wafdi uu hogaaminayay oo maalin ka hor ka soo laabtay Beledweyn ayaa kulamo uu la qaatay odayaasha dhaqanka Gobolka Hiiraan kala hadlay sidii dib loogu ambaqaadi lahaa shirka Maamul u sameynta Hiiraan iyo Sh/Dhexe ee gogoshiisa taalo Beledweyn.
Kulamadaas oo ahaa kuwo saacado badan qaatay ayaa markii dambe wax natiijo ah ka soo bixi waayeen, inkastoo Odayaasha dhaqanka Gobolka Hiiraan hordhigeen labo qodob oo kala ah in la qabto dib u heshiisiin iyo in gogosha lagu soo celiyo magaalada Beledweyn.
Ugaas Xasan Ugaas Khaliif ayaa beeniyay warar soo baxayay oo sheegayay in la isku afgartay kulamadaas, waxaana uu meesha ka saaray war ka soo baxay Wasiirka Warfaafinta oo ahaa in safarkii Ra’iisul Wasaaraha guul ku soo dhamaaday, isla markaana odayaasha ay aqbaleen inay Jowhar tagaan.
Wasiirka Arrimaha Gudaha iyo wafdi uu hogaaminayo ayaa wali ku sugan magaalada Beledweyn, kuwaasoo aan wali ku guuleysan inay xal ka gaaraan caqabadaha wali ka taagan shirka maamul u sameynta Hiiraan iyo Sh/Dhexe.
Lama oga sida uu Madaxweynaha ugu guuleysan doono safarkiisa labaad muddo labo bil gudahood oo uu ku tagi doono Beledweyn, iyadoo safarkiisii u dambeeyay aanu wax guul ah kala soo laaban, marka laga reebo in odayaasha dhaqanka ay shuruudo hor dhigeen.
Shirka Maamul u sameynta Hiiraan iyo Shabeellaha Dhexe oo 12-kii bishii Janaayo ka furmay magaalada Jowhar ayaa wali waxaa uu hakad uga jiraa diidmo iyo cabasho ka timid qaar ka mid ah Beelaha reer Hiiraan oo horay u saluugay saami qeybsigii beelaha ee nabadoonada soo xuleysa ergooyinka shirka.
Idale News Online, Muqdisho
