Awdheegle(INO)- Maxamed Aweys Abuukar gudoomiyaha degmada Awdheegle ee gobolka Shabeelaha Hoose ee dowlada Soomaaliya ayaa faahfaahin dheeraad ah kabixiyay weerar diyaarado dagaal ay ka geysteen degmada Awdheegle.
Gudoomiyaha ayaa sheegay in ciidamo ajaaniib ah howlgalkaasi ka geysteen degmada Awdheegle, ayna ku dileen xubno Al-shabaab ka tirsan, sida uu hadalka u dhigay.
Gudoomiyaha oo la hadlay warbaahinta ayaa ka gaabsaday inuu faahfaahin ka bixiyo wadanka ay kasoo jeedeen ciidamada weeraray Awdheegle, laakiin wuxuu sheegay iney ku sugnaayeen meel 7 km u jirta degmada.
Sidoo kale wuxuu sheegay in weerarka oo ahaa mid dhacay xalay saqdhii dhexe uu ka dhacay afar goobood oo Alshabaab fariisin ay ku leeyihiin oo ku taala duleedka iyo gudaha degmada Awdheegle ee gobolka Shabeelaha Hoose.
Afhayeenka ciidamada Alshabaab Abuu Muscab ayaa isaga oo la hadlay warbaahinta Alshabaab wuxuu dhankiisa sheegay iney fashiliyeen qorshe labo diyaaradood oo helicopter ah ku doonayeen iney ku weeraraan degmada Awdheegle. Ma jirto ilaa iyo hadda dowlad sheegatay iney falkaasi ka dambeysay.
Halkan Ka Dhageyso
Idale News Online, Awdheegle
