Riqqa(INO)-Muuqaal lagu baahiyay baraha bulshada oo ay ka soo muuqdeen Dagaalyahano Soomaali u dagaalama Dowladda Islaamiga ama Daacish ayaa waxay ugu baaqeen Al-Shabaab inay ku soo biiraan oo ay la midoobaan.
Muuqaalkan ayaa halku dhigiisu ahaa Fariin ku socota Muslimiinta Soomaaliya, waxaana xubnaha ka soo muuqday ay ku hadlayeen afka Soomaaliya, iyagoo ugu gacan haatinayay Al-Shabaab inay ugu soo biiraan si la mid ah Boko Haram-ta Nigeria, Masar, Yemen iyo Libiya.
Taymuulah Al-Somali oo ah nin araga la’ horayna ugu biiray Daacish ayaa hadalkiisa sidan ku bilaabay “Fariintan waxay ka timid dhulka Khilaafada, waxayna ku socotaa Muslimiinta ku nool, dhulka aan jecel nahay ee Soomaaliya, walaalaheena la kulmay dulmi uga yimaaday Murtadiinta iyo Gaalada”
“Ogaada maanta inaa leedihiin dowlad iyo khilaafo islaami ah, sharaftiina ilaalineysa, qortana ka goyneysa kuwa idin dulmiyay, cadaab darana idin soo marsiiyay oo ah gaalada Itoobiyaanka iyo kuwa kale ee duulaanka ku ah dhulka Muslimiinta”ayuu yiri.
Sidoo kale ruux kale oo Soomaali ah oo isna ka soo muuqday muuqaalkan laguna magacaabayay Abuu Hamza Al-Somali ayaa sheegay in haatan ay ka jirto Caalamka Khilaafo u istaagan inay xuduuda oogto, Gaaladana ka qaado Jizyo, waxaa uu xusay inay Umadda sharciga eebe ku xukumayaan si dhameystiran oo aan nusqaan laheyn, una istaagayaan Jihaadka sida uu yiri
“Guusha dhan waxay ka timid xooga alle xageena kama imaan, kuwa run sheegayaasha ee dhulka Soomaaliya jooga, waxaa leenahay waa taas Khilaafada Islaamiga ee idinku soo dhow oo aad u ujeediin inay timid Nigeria, Jaziirada Carab, Yemen, iyo Masar, waa taas aad dareenteen ku soo dhowaada dowladiina”ayuu yiri Abuu Hamza.
Inkastoo muuqaalkan uu socday 5 daqiiqo iyo 52 ilbiriqsi ayaa waxaa ka dhex muuqday dagaalyahano aad u hubeysan iyo rag kale oo Soomaali ah, waxayna wateen baabuurta casriga ah, iyadoo goobta ay ka soo muuqdeen ay aheyd deegaan ku yaalla xuduuda Ciraaq iyo Suuriya oo la isku daray.
Daacish ayaa haatan gacanta ku heysa dhul ballaaran oo ka tirsan Suuriya iyo Ciraaq, iyadoo ay ka bar bar dagaalamaan dagaalyahano ka yimid Caalamka, waxaana haatan lagu qiyaasayaa Soomaalida ku biirtay boqolaal, inkastoo aan tiro sax ah laheyn.
