Muqdisho(INO)-War goor dhow na soo gaaray ayaa sheegaya in Gudoomiyeyaasha degmooyinka Hodan iyo Dharkeenley xil ka qaadis lagu sameeyay, kadib wareegto ka soo baxday Wasiirka Arrimaha Gudaha iyo Federaalka C/raxmaan Odawaa.
Sida ay sheegayaan wararka Gudoomiyaha Gobolka Banaadir ahna duqa magaalada Muqdisho Xasan Maxamed Xuseen (Muungaab) ayaa soo jeediyay xil ka qaadista Gudoomiyeyaashan, iyo magacaabista labada Gudoomiye cusub.
Wareegtada oo nuqul ka mid ah ay heshay Warbaahinta Idale News Online ayaa waxaa xilalka looga qaaday Gudoomiyihii degmada Hodan C/qaadir Cali Kulane, waxaana lagu bedelay Marwo Xaawo Kiin Maxamuud Cali oo noqoneysa haweeneydii u horeysay ee Gudoomiye looga dhigo degmo ka tirsan Gobolka Banaadir.
Sidoo kale Gudoomiyihii degmada Dharkeenley Aadan Maxamed Cumar ayaa xilka laga qaaday, waxaana lagu bedelay Cumar Meyre Mocow.
Xilka qaadistan ayaa noqoneysa tii u horeysay ee lagu sameeyo Gudoomiyeyaal degmo, tan iyo markii sanadkii hore is bedelkii ugu ballaarnaa lagu sameeyay Gudoomiyeyaashii degmooyinka ee mudada xilka hayay.
Idale News Online, Muqdisho
