Baydhabo(INO)-Maamulka deegaanka Goofgaduud ee gobalka Bay ayaa sheegay in ciidamada Kooxda Al-shabaab aanay marna damac kasoo galayn in duulaan ay kusoo qaadaan deegaankaasi oo ay ku suganyihiin ciidamada dowladda Federaalka iyo kuwa AMISOM.
Gudoomiyaha deegaankaasi Axmed Maxamed Aadan ayaa sheegay in ciidamada dowladda ay yihiin kuwo heegan ku jira xilli walba, islamarkaana ka feejigan duulaano ay soo qaadaan Al-shabaab.
Waxa uu tilmaamay in maalmihii ugu dambeeyay ay ciidanka sameeyeen howlgallo amaan sugid ah, ayna ku wajahaheen deegaano badan oo ku dhaw Goofgaduud.
Mar aynu wax ka weydiinay sababta inta badan keenta in ciidamada ay kasoo laabtaan deegaanada ay Al-shabaab ka saaraana walibana ku dhaw deegaanka Goof-gaduud ayuu sheegay in ay jiraan arimo badan oo dhanka Milatariga ah.
Weeraro ayuu sheegay in dhawaan ay ku qaadi doonaan deegaano badan oo hoostaga Goofgaduud, lana diyaarinayo ciidamo dega meel walba oo la qabto.
Idale News Online, Baydhabo
