Iyadoo maalinta beri oo Axad ah lagu wado in xildhibaanada loo qeybiyo mooshin ay keeneen 168 xildhibaan oo isugu jira kuwa gudaha dalka ku sugan iyo kuwa kale oo dalkaba joogin ayaa waxaa magaalada Muqdisho si howli ah uga socda balanqaadyo iyo bixinta lacago faro badan oo ay Ra’iisul Wasaaraha Xukuumada Federaalka Soomaaliya Mudane Cabdi Faaarax Shirdoon Saacid iyo Madaxweynaha Jamhuuriyada Federaalka Soomaaliya Mudane Xasan Sheikh Maxamuud ku raadinayaan kalsoonida inta badan xubnaha Barlamaanka Somalia oo ayagu leh go’aanka ugu dambeeya ee lagu gaaraayo khilaafka hareeyay masuuliyiinta sare ee Soomaaliya.
Lacago lagu qiyaasay Malaayin doolar ayaa dhinacyadu u adeegsanayaan sidii midba midka kale uu uga taqaluusi lahaa waxaana lacagaahasi la qarash garaynaayo ay iskugu jiraan kuwa Dowlado dano ka leh Somalia ay ku bixinayaan iyo kuwa laga soo aruuriyay Shacabka Soomaaliyeed si qaldanna loo adegsanayo.
Garabka Madaxweynaha Somalia Xasan Sheikh Maxamuud oo niyadoodu aad u sareeyey maalmihii ugu dambeeyey rajana ka qabo in Ra’iisul Wasaare Saacid meesha ka baxo ayaa hadda muuqda culeys ka imaanaaya xildhibaanada wareegeysta dhaqaale ka helay dhanka ra’iisul wasaaraha kuwaasoo shaki galiyey in maalinta codbixinta inay isbedel ku yimaado.
Sida ilo xog ogaal ah ay la wadeegeen Idale News Online garabka Ra’iisul wasaare Saacid waxaa hadda si toos ah ugu soo biiray labo diblamaasi oo ka socda dowlada Itoobiya kuwaasoo hadda ku sugan magaalada Muqdisho.
Labada Masuul ee la safan siyaasada R/W Saacid ayaa la sheegayaa in a yihiin Safiirka dowlada Itoobiya ay dhawaan u soo magacowday Somalia iyo waliba u qaybsanaha dhanka Siyaasada Somalia ee Dowlada itobiya Genaraal Gabre waxaana durba labdadaasi masuul oo dalka Itoobiya ka socota bilaabeen la kulanka xildhibano ay horay u taageersanaa siyaasada madaxweynaha iyagoo ka dhaadhicinaaya in Raisalwasaare Saacid u sii joogo xafiiska Raisalwasaraha Somalia.
Dowladaha Qadar iyo Itobiya ayaa la rumeysan yahay in ay khilaafka ka dhex aloosan madaxweynaha iyo ra’iisul wasaarihiisa uga sii dareen ka dib markii ay bilaabeen kulamo ay la kala yeelanaayaan xildhibaanada soomaaliyeed, mana jirto wax waanwaan iyo isu soo dhawaansho ay ka shaqeeyeen tan iyo markii uu khilaafka labada masuul ka dhex curtay.
Idale News Online
