Wafdi ka socda Safaaradda Soomaaliya ee Turkiga Oo Maanta si heer sare ah loogu soo dhaweeyey Muqdisho

38

Wafdi ballaaran oo ka socda Safaaradda Soomaaliya ee Dalka Turkiga ayaa maanta soo gaaray magaalada Muqdisho ayadoo wafdigaasina si heer sare ah loogu soo dhaweeyey garoonka diyaaradaha Aadan Cade ee magaalada Muqdisho.

Wafdigan oo uu hogaaminayey xogahayha Koobaad ee Safaaradda Soomaaliya ee Turkiga Mudane C/qaadir Maxamed Nuur (Jaamac) ayaa waxaa garoonka diyaaradaha kusoo dhaweeyey Xildhibaanno ka tirsan Baarlamaanka Federaalka Soomaaliya,Saraakiil ka kala socotay Ciidammada Qalabka Sida ee Soomaaliyeed,siyaasiyiin,waxgarad iyo qeybaha kala duwan ee Bulshada.

Markii wafdigaasi diyaaradii waday oo aheyd mid ka mid ah diyaaradaha Shirkadda Turkish Air Ways ay soo caga dhigatay garoonka diyaaradaha Aadan Cadde kadib ayaa waxa uu xoghayaha koobaad ee Safaaradda mid mid u gacan qaaday dhammaanba dhinacyadii kala duwanaa ee garoonka kusoo dhaweeyey.

Xogahayaha koobaad ee Safaaradda Soomaaliya ee Turkiga Mudane C/qaadir Maxamed Nuur (Jaamac) oo wafdiga hogaaminayey ayaa saxaafadda kula hadlay gudaha garoonka diyaaradaha Aadan Cadde waxaana uu u mahad celiyey qeybihii kala duwanaa ee soo dhaweeyey isagoo dhanka kalena ka hadlay socdaalka wafdigan ka socda Safaaradda Soomaaliya ee Turkiga ee uu hogaaminayo ay u yimaadeen magaalada Muqdisho.

C/qaadir Maxamed Nuur (Jaamac) Xoghayaha Koobaad ee Safaaradda ayaa tilmaamay in u jeedada ay wafdigan u yimaadeen magaalada Muqdisho ay tahay ka jawaabid ay ka jawaabayaan u yeeris ay Wasaaradda Arrimaha Dibadda Soomaaliya u yeertay dhammaanba safiirrada,mas’uuliyiinta iyo howlwadeennada Safaaradaha Soomaaliya ay ku leedahay dalka dibaddiisa.

Dhanka kale Xoghayaha koobaad ee Safaaradda Soomaaliya ee Turkiga ayaa ka hadlay waxqabadka Safaaradda iyo sida ay ugu adeegaan bulshada Soomaaliyeed ee ku sugan dalka aynu walaalaha nahay ee Turkiga oo ay ugu horeeyaan Ardayda Soomaaliyeed ee dalkaasi deeqaha waxbarasho ka helay iyo wanaajinta xiriirka ka dhaxeeya labada Dowladood ee Soomaaliya iyo Turkiga.

“runtii waxqabadka Safaaradda ma ahan mid aan kusoo koobi karo halkaan cid walba oo Soomaali ahna waxaan aaminsanahay iney ogtahay balse mida ku saabsan Ardayda waxaan mar walba ka warqabnaa xaaladda ay Ardayda ku suganyihiin, noloshooda iyo sida ay waxbarashadooda ay tahay marka aan la socod leeyahayna waan kormeernaa xili walba si aan u ogaano baahidooda iyo halka ay wax u marayaan sababta aan sidaa u sameynana waa in Ardaydu ay yihiin mustaqbalka Dalkeenna ee berrito” ayuu yiri Xoghayaha Koobaad ee Safaaradda Soomaaliya ee Turkiga Mudane C/qaadir Maxamed Nuur (Jaamac).

Soo dhaweynta garoonka diyaaradaha Aadan Cadde loogu sameeyey wafdigan ka socday Safaaradda Soomaaliya ee Turkiga ayaa noqoneysa soo dhaweyntii ugu sareysay ee magaalada Muqdisho mas’uuliyiinta safaaradaha Soomaaliya ee dalka dibaddiisa ka imaanayey mudooyinkan waxaana soo dhaweynta heerka sare ah ee wafdigaasi loo sameeyey ay muujineysaa sida ay qeybaha kala duwan ee bulshada Soomaaliyeed ugu qanac sanyihiin waxqabadka Safaaradda Soomaaliya ee Turkiga.

Idale News Muqdisho

You might also like More from author

Comments are closed.